ខេត្តកំពង់ធំ៖ ទុនសរុបចំនួន ៩០លានរៀល កំពុងត្រូវបានផ្តល់តាមរយៈគម្រោងលើកកម្ពស់ជីវភាពប្រជាជន ដល់សហគមន៍កសិកម្មចំនួន៥ ក្នុងស្រុកស្ទោង ខេត្តកំពង់ធំ ដើម្បីឱ្យសមាជិកមានដើមទុនបង្កើត និងពង្រីកមុខរបរ ផ្តោតលើការដាំដុះ និងចិញ្ចឹមសត្វ សំដៅបង្កើនប្រាក់ចំណូលគ្រួសារ។ ក្នុងចំណោមសហគមន៍ដែលទទួលបានការគាំទ្រ សហគមន៍កសិកម្មសំព្រោជមានជ័យ ស្ថិតនៅឃុំសំព្រោជ ស្រុកស្ទោង កំពុងយកទុននេះទៅប្រើប្រាស់លើ ការដាំបន្លែសុវត្ថិភាព ការចិញ្ចឹមមាន់ និងការចិញ្ចឹមជ្រូក។ ផលិតផលដែលបានពីការងារកសិកម្ម ត្រូវបានប្រមូលផលជាបន្តបន្ទាប់ និងមួយចំនួនត្រូវបាននាំទៅលក់នៅទីផ្សារក្នុងមូលដ្ឋាន។

លោក សាយ គឹមឡម អភិបាលស្រុកស្ទោង និងសហការី ព្រមទាំងមន្ត្រីជំនាញ នៅព្រឹកថ្ងៃទី២០ ខែសីហា ឆ្នាំ២០២៦ បានចុះជួបសំណេះសំណាលជាមួយកសិករ និងពិនិត្យវឌ្ឍនភាពការអនុវត្តគម្រោងនៅសហគមន៍កសិកម្មសំព្រោជមានជ័យ ដើម្បីស្វែងយល់ពីលទ្ធផលការងារ បញ្ហាប្រឈម និងតម្រូវការគាំទ្របន្ថែមរបស់សមាជិកសហគមន៍។

លោកអភិបាលស្រុកបានបញ្ជាក់ថា ទុនដែលផ្តល់ជូនសហគមន៍ មានគោលដៅជួយឱ្យប្រជាពលរដ្ឋមានលទ្ធភាពបង្កើតមុខរបរ និងពង្រីកការផលិត ដោយមានការណែនាំបច្ចេកទេសពីមន្ត្រីជំនាញ ដើម្បីកាត់បន្ថយថ្លៃដើម កាត់បន្ថយហានិភ័យ និងបង្កើនទិន្នផល ព្រមទាំងប្រាក់ចំណេញពីមុខរបរ។ ក្រៅពីទុន ៩០លានរៀលនេះ រដ្ឋបាលស្រុកស្ទោងក៏មានទិសដៅបន្តអនុវត្តគម្រោងលើកកម្ពស់ជីវភាពប្រជាជននៅ សហគមន៍កសិកម្មចំនួន៧ផ្សេងទៀត ដើម្បីពង្រីកការគាំទ្រដល់ប្រជាពលរដ្ឋ និងជំរុញការបង្កើតមុខរបរដែលអាចបង្កើនប្រាក់ចំណូលក្នុងគ្រួសារ។

តំណាងសហគមន៍សំព្រោជមានជ័យបានឱ្យដឹងថា សហគមន៍ក៏ទទួលបានការគាំទ្រពីថ្នាក់ជាតិ និងដៃគូអភិវឌ្ឍន៍ តាមរយៈការកសាងផ្លូវលំចូលទៅកាន់ទីតាំងផលិតកម្មបន្លែសុវត្ថិភាពក្នុងផ្ទះសំណាញ់ ព្រមទាំងសម្ភារៈ និងឧបករណ៍កសិកម្មមួយចំនួន។ ការគាំទ្រទាំងនេះ បានជួយឱ្យសមាជិកបន្តការផលិត និងមានលទ្ធភាពភ្ជាប់ផលិតផលទៅកាន់ទីផ្សារ។

លោក កាំង សុផាន់ណា ប្រធានការិយាល័យកសិកម្ម ធនធានធម្មជាតិ និងបរិស្ថានស្រុកស្ទោង បានលើកឡើងពីការរៀបចំសមាជិកសហគមន៍ជាក្រុមផលិត ដើម្បីឱ្យមានផលិតផលជាក់លាក់ រៀបចំផែនការដាំដុះឱ្យស្របតាមតម្រូវការទីផ្សារ និងកាត់បន្ថយចំណាយផលិតកម្ម។ ការងារនេះ ក៏ផ្តោតលើការភ្ជាប់សហគមន៍ជាមួយវិស័យឯកជន ដៃគូអភិវឌ្ឍន៍ និងការគាំទ្របច្ចេកទេស ដើម្បីពង្រឹងសមត្ថភាពផលិតកម្មរបស់កសិករ។

សម្រាប់សហគមន៍សំព្រោជមានជ័យ ការដាំបន្លែសុវត្ថិភាព និងការចិញ្ចឹមសត្វ មិនត្រឹមតែជាការបង្កើតផលិតផលសម្រាប់ទីផ្សារប៉ុណ្ណោះទេ ប៉ុន្តែជាការប្រើប្រាស់ដើមទុនដើម្បីបង្កើតមុខរបរ និងបង្កើនប្រភពចំណូលសម្រាប់គ្រួសារ។ ខណៈរដ្ឋបាលស្រុកគ្រោងពង្រីកគម្រោងទៅកាន់សហគមន៍កសិកម្មចំនួន៧ផ្សេងទៀត ការគាំទ្រទុន បច្ចេកទេស និងទីផ្សារ នឹងក្លាយជាកត្តាសំខាន់សម្រាប់ឱ្យសហគមន៍កសិកម្មអាចផលិតបានមានប្រសិទ្ធភាព និងមានទីផ្សារកាន់តែច្បាស់លាស់។